खर्च लाखौं, पर्यटक शून्य

रुकुम, २० चैत
रुकुममा पर्यटन वर्ष २०११ मा आउने पर्यटक संख्या शून्य छ । पर्यटन वर्र्ष सफल पार्न जिविसअन्तर्गतको सबै पक्षको सहमति र सर्वपक्षीय भेलाबाट जिल्ला पर्यटन समन्यय समिति गठन गरिए पनि कुनै निकायसँग पर्यटक आगमनको तथ्यांक छैन ।
यता, पर्यटन वर्षको नाममा लाखौं रकम खर्च भएको छ । जिल्लामा पर्यटन समन्यय समिति गठन, पर्यटकीय सम्पदाहरुको प्रचारप्रचारका लागि ‘नयाँ गन्तव्य’ नामक डकुमेन्ट्री, रुकुममा पहिलो स्यार्पु महोत्सव आयोजना र केही पोस्टर प्रकाशनका काम भएको बताइएको छ । डकुमेन्ट्रीमा ७ लाख, स्यार्पु महोत्सवमा १५ लाख र मौराखारा लेखमा खानेपानी आयोजनाका लागि ५ लाख खर्च भएको छ । तर, प्रगतिबारे यस क्षेत्रमा कार्यरत सरकारी तथा गैरसरकारी निकाय अन्योलमा छन् । पर्यटन वर्षमा कति खर्च भयो र के प्रगति भयो भन्नेबारे केही थाहा नभएको जिविसका सूचना अधिकृत चिन्तामणि दाहालले बताए ।
“रुकुममै पहिलोपटक आयोजना गरियको स्यार्पु पर्यटन महोत्सवको खर्च विवरणसमेत आयोजकले उपलब्ध गराएको छैन,” उनले भने, “पर्यटनसम्बन्धी गतिविधिका खर्चबारे जिविसलाई जानकारी नै गराइँदैन अनि कसरी पर्यटन वर्षको खर्च तथा उपलब्धिको समीक्षा गर्ने ?” पर्यटन वर्षभरिमा सरकारी तथा गैरसरकारी निकायबाट करिब ५०–६० लाख रुपैयाँ खर्च भएको अनुमानसम्म गरिएको छ ।
जिल्लामा हालसम्म पर्यटन डेस्क पनि स्थापना गरिएको छैन । “पर्यटन डेस्क स्थापना नभएकाले पर्यटक संख्याबारे अन्योल छ,” स्थानीय विकास अधिकारी भरतकुमार शर्माले भने, “आउन त धेरै आए होलान् शून्यै त छैन होला ।” रुकुमको पर्यटन विकासका लागि पर्यटन गुरुयोजनाबारे छलफल भइसकेकोले अब छिट्टै गुरुयोजना बनाएर अघि बढ्ने उनले बताए ।
पर्यटन वर्षको सुरुमा केन्द्रबाट आएको पैसा खर्च गर्नमात्र सानातिना गतिविधि सञ्चालन गरिएको भए पनि पर्यटन सम्पदाको संरक्षण, सम्वद्र्धन तथा पर्यटन आवागमनलाई टेवा पुग्ने कुनै पनि कार्यक्रम नगरिएको सरोकारवाला बताउँछन् । प्रचारप्रसारलाई समेत प्राथामिकतामा नराख्दा आउँदा दिनमा पनि पर्यटक भित्रिने सम्भावना न्यून भएको पर्यटन व्यवसायीको ठम्याइ छ ।
आन्तरिक तथा बाह्य पर्यटक नआउँदा जिल्लाका पर्यटकीय स्थल पनि सुनसान रहेको स्थानीयवासी बताउँछन् । पर्यटकीय सम्भावना बोकेको ५२ पोखरी ५३ टाकुरीको जिल्ला रुकुमबारे प्रचारप्रसार नहुँदा पर्यटक नभित्रिएको उनीहरूको आरोप छ । स्यार्पुताल, कमलताल, साखदह, कमलपोखरी, शीतलपोखरी, सिस्ने हिमाल, उत्तरगंगा, शाहीकुमारी मन्दिर, साततले गुफा, महेन्द्र गुफा आदि रुकुमका आकर्षण हुन् ।

Source Karobar daily मेगराज खड्का
मिति: 2012-04-03