‘हेली सफारी’

‘हेली सफारी’

काठमाडौं, २० चैत
मुलुकका दुर्गम क्षेत्रमा खाद्यान्न ढुवानी गर्दै आएका हेलिकप्टर सेवा प्रदायक कम्पनीहरू पछिल्लो समय ‘हेली सफारी’को नयाँ क्षेत्रमा आकर्षित भएका छन् ।
आन्तरिक पर्यटनलाई मध्यनजर गरी वायुसेवा कम्पनीहरूले ‘हेली सफारी’ प्याकेज प्रदान गर्न थालेका हुन् । हवाई यात्राको आनन्द लिन प्याराग्लाडिङ रोज्ने पर्यटकहरू हाल हेली सफारीमा आकर्षित देखिएका छन् । प्याराग्लाडिङमा उड्नुभन्दा हेलिकप्टर यात्रा सस्तो छ ।
विभिन्न क्षेत्रमा सञ्चालन भइरहेका मेला र महोत्सवमा हेली सफारी फेसनजस्तै भइसकेको छ । करिब ५ महिनाअघि सिन्धुपाल्चोक महोत्सवबाट सुरु भएको हेली सफारीको अनुशरण अहिले सबैजसो मेला आयोजकले गर्न थालेका छन् । गत सातादेखि सञ्चालन भएको बागलुङ महोत्सवमा समेत हेलि सफारी प्याकेज उपलब्ध भएपछि स्वदेशी पर्यटक हेलिकप्टर चढ्न उत्साहित देखिएका छन् । प्याराग्लाडिङ गर्न प्रतिपर्यटक न्यूनतम ६ हजार ५ सय रुपैयाँ खर्च गर्नुपर्ने भए तापनि हेली सफारीका लागि प्रतिव्यक्ति ४ हजार ५ सय रुपैयाँ मूल्य निर्धारण गरिएको छ ।
निजी वायुसेवा कम्पनी सिम्रिक एयरले बागलुङ महोत्सवको अवसरमा हेली सफारी सञ्चालन गरिरहेको छ । यसअघि पोखरा र चितवन क्षेत्रमा समेत हेली सफारी प्याकेज प्रदान गरेको थियो । प्याकेजबारे जानकारी दिँदै सिम्रिक एयरका महाप्रबन्धक योगराज कँडेल भन्छन्, “विशेषगरी आन्तरिक पर्यटकलाई मध्यनजर गरी हामीले नै पहिलो पटक नयाँ प्रडक्ट घोषणा गरेका हौं, जुन सफतापूर्वक सम्पन्न भइरहेको छ ।” हेलिकप्टर चढ्न ठूलो रकम खर्च गर्नुपर्छ भन्ने सर्वसाधारणको भ्रम हटाउनसमेत प्याकेज सफल भएको उनले बताए ।
बागलुङ महोत्सवमा सोमबारसम्म ९० जनाले हेलिकप्टर सफारी गरिसकेको बागलुङस्थित सिम्रिक एयरका अपरेसन अधिकृत कमल गौतमले जानकारी दिए । उनका अनुसार महोत्सव अवधिभर १५ हजार र ६ हजार ५ सय रुपैयाँका दुईथरी प्याकेज सञ्चालनमा छन् । १५ हजार मूल्यमा बागलुङ सहरबाट एकमात्र सिकार आरक्ष ढोरपाटन पुगेर फर्किन सकिन्छ भने सस्तो प्याकेजमा बाग्लुङ उपत्यका हँुदै कुश्माको पर्वत बजार र बेनी सहर हुँदै फर्किन सकिन्छ । दुवै खाले हेली प्याकेजमा महोत्सवलाई हवाई दृश्यावलोकन गर्न सकिन्छ । महँगो प्याकेज ४५ मिनेटको छ भने सस्तो १५ मिनेट मै सम्पन्न हुने गौतमले बताए ।
यसअघि पोखरा हेली सफारीमा पोखरादेखि अन्नपूर्ण सर्किट तथा आकासबाट फेवा, वेगनास तालहरूको दृश्यावलोकनका लागि ५ हजार ५ सय रुपैयाँ प्रतिव्यक्ति मूल्य तोकिएको थियो । आन्तरिक तथा बाह्य यात्राका क्रममा हवाई यात्रा गरिने भए तापनि हेली सफारी गर्नु पर्यटकका लागि नौलो अनुभव भएको सिम्रिक एयरले जनाएको छ ।
मुलुकभर महोत्सवको रौनक बढेसँगै नयाँ प्रडक्टका रूपमा हेली सफारी प्याकेज समेत फस्टाउँदै गएको छ । व्यवसायिक दृष्टिले खासै नाफा नरहे पनि आन्तरिक पर्यटन प्रवद्र्धनका लागि हेली सफारीलाई देशभर विस्तार गर्ने योजना रहेको एयरले जनाएको छ ।

Source: Karobar Daily